AP: Itanagar leh Pasighat Municipal Council May 29-ah inthlang dawn

Arunachal Pradesh State Election Commission (SEC) chuan Inrinni khan thuchhuah siamin May 29 hian Itanagar leh Pasighat municipal council inthlan neih a ni dawn tih a tarlang.

Hetih lai hian eng emaw buaina a awm avang­in panchayat inthlan hun erawh tihchian theih a la ni lo tih an tarlang a, hei hi tunhnai maia siam­thar Arunachal Pradesh Pancha­yat Raj Amendment Bill 2018 kaihhnawihah thil fel tawk lo a la awm vang tih an tarlang bawk.

State Election Commissioner Hage Kojeen chuan Itanagar Municipal Council-ah hian ward 30 a awm thu sawiin elector 64,799 an awm tih a sawi a, hetih lai hian Pasighat Municipal Council-ah erawh elector 9,646 awmin ward 12 a awm thung tih a sawi.

Kojeen chuan inthlan neih tur atana hriattur pawimawihte chu May 1 hian tarlan a ni dawn tih sawiin May 8 thleng nomination a thehluh theih dawn tih a sawi bawk.

Arunachal Pradesh khawpui lian pahnih municipal council inthlan turah hian May 14 thleng candidate-te an inhnuhdawh phalsak a ni dawn a, May 10 hian nimination paper enfiah a ni ang. Vote hi May 31 hian chhiar a ni ang a, June 7 hi chuan inthlan leh a kaihhnawiha buaipui ngai ang zawng zawng chu buaipui fel vek turin ruahmanna siam a nih thu SEC chuan an tarlang. Commission hian Itanager municipality tan hian observer pahnih a ruat a, Pasighat municipality tan hian observer pakhat a ruat thung.

Kojeen chuan chuan pancha­yat inthlan hun tur tihfel theih a la nih loh chhan sawiin Arunachal Pradesh Panchayat Raj Amendment Bill 2018, state Assembly in a pawm takah khan three-tier Panchayat Raj system ni ṭhin kha two-tier system-a thlak a nih thu a sawi. Kojeen chuan dan anga tihfel ngai zawng zawng tihfel a nih hunah inthlanna chu nei turin state sorkar chuan thutlukna a siam a ni, a ti.