China in Brahhmaputra leh Sutlej data hrilh remti

External Affairs Minister Sushma Swaraj, Beijing a thang mek chuan Pathianni khan China in Brahmaputra leh Sutlej lui hydrological data India hnena hrilh a remti ve leh ta tih a sawi. China hian heng lui pahnih hydrological data hi Dokalam-a India nena an inep aṭang khan India hi a hrilh tawh ngai lo a, tunah chuan an hrilh chhunzawm leh dawn ta tih Swaraj chuan a sawi.

Hydrological data hmang hian hmarchhaka Brahmaputra lui lian tur a hriat lawk theih ṭhin a ni.

Sushma Swaraj hi ni li cham turin Beijing-ah a thang mek a, Inrinni khan kalin Shanghai Cooperation Organisation (SCO)-a foreign ministers’ mee­ting-ah a tel. He hunah hian China foreign minister Wang Yi hmu nghalin ram pahnih inkara buaina awm chinfelna tur kawng an sawidun a, ram pahnihin inlaichinna ṭha zawk an neih theih dan tur an sawidun.

Swaraj chuan Wang nena joint media event an neihnaah ram pahnih mipuite inkara inbiakpawhna ṭha zawk a awm theih nan leh ram pahnihin inlaichinna ṭha zawk an neih dan tur an sawidun thu a sawi a, hemi chungchangah hian China lamin Brahmaputra leh Sutlej lui hydrological data kumin aṭanga India an hrilh ve leh ṭhin tawh tur chu lawmawm a tih thu a sawi a, he thil hi lui chhehvela chengte tan chuan thil pawimawh tak a nih thu a sawi.

Thla hmasa khan India Mi­nistry of Water Resources official team-te chuan nikum lama Beijing in lui data a hlanchhawn ve tak loh avang khan China-a Hangzhou-ah China thuneitute inbiakna an lo neihpui tawh bawk. Ram pahnihin Memorandums of Understanding an ziahnaah China hian Brahmaputra(Yarlong Zangbo) leh Sutlej (Langqen Zangbo) lui te hydrological data hi India hnenah a hlanchhawng ve tura tih a ni. Hemi a nih avang hian China hian kumtin tui len hunlai May 15 leh October 15 chhung hian data hi a hlanchhawng ve ziah a ni.

Mahse nikuma China in India-a Chicken Neck corridor an tih mai hmarchhak leh India mainland inzawmna lai bula kawng siam a tum avanga China sipai leh India sipaite ni 73 lai mai Dokalam-a an inep aṭang khan China hian data hi a hlan­ chhawng duh ta lo a, thla eng emaw zat data hi a hlanchhawng tawh lo a ni.

External Affairs Minister chuan India leh China chuan Sikkim-a Natha Lu kawng kaltlangin Kailash Mansarovar Yatra pawh chhunzawm an tum leh tawh tih a sawi a, Kailash Mansarovar Yatra hi thla 10 lai Dokalam inepna avang khan chhunzawm a ni tawh lo bawk. Chhunzawm leh tura thutlukna hi Sushma Swaraj leh Wang Yi-ten inbiakna an neihah hian an siam niin External Affairs Ministry chuan a tarlang.

Swaraj chuan Kailash Man­sarovar Yatra chhunzawm leh a ni tur chu lawmawm a tih thu a sawi a, China lam pawhin theihtawp chhuaha an thawhho pui ngei a rin thu a sawi.

Ministry of External Affairs hian yatra hi kumtin June leh September inkarah a buastaih ṭhin a, Lipulekh Pass (Uttarakhand) leh Nathu La Pass (Sikkim) kaltlangin a buatsaih ṭhin a ni.