Tripura CM-in thutiam tihhlawhtlin nan Sorkar laipui ṭangpuina ngen

Tripura Chief Minister Biplab Kumar Deb chuan inthlan dawna an thutiam te tihhlawhtlin a nih theih nan Prime Minister hnen aṭangin ṭanpuina sum leh pai pek belh a beisei thu a sawi.

Zirtawpni kalta khan CM Deb hian New Delhi-a Prime Minister Office-ah Nripendra Misra, Principal Secretary to Prime Minister hmuin an thil beisei tihlawhtling tura hmalak pui tura a ngen thu official thuchhuah chuan a tarlang.

Chief Minister chuan state mipuite hnenah thu eng emaw zat an tiam thu a sawi a, heng an thutiamte tihhlawhtlin a nih theihna tur hian sorkar laipui aṭangin ṭanpuina sum an mamawh belh tih a sawi a, state sorkar chuan sum leh pai lamah harsatna an ngah thu a sawi bawk.

CM hian school zirtirtu post ruak 12,222 hnawhkhahna tur te, 7th central Pay Commission recommendation anga sorkar hnathawk te hlawh pek tur te leh Central Agricultural University dinna tur bakah super specialty hospital Tripura-a dinna turin sorkar laipui aṭangin sum a beisei a ni.

Heng bakah hian Deb chuan nikuma journalist pahnih thah an nih chungchang chhuichiang turin CBI kohluh an nih theih dan tur a ngaihtuah bawk. Thla hmasaa BJP-IPFT sorkar council of ministers-ten meeting hmasa ber an neih khan journalist thah te case, CBI kuta chhuichiang tura thutlukna an siam chu CM hian a bawhzui a ni.

Thla hmasa BJP-IPFT ṭangrual in sorkarna an siam hnu aṭang khan sorkar laipui chuan development project leh scheme hrang hrang atan cheng vaibelchhe 2, 587 an sanction tawh a ni.