Naga leader thah a nih chungchangah JAC-in nawrh huaihawt

Manipur-a Naga leader, Athuan Abonmai thah a nih chungchangah, Joint Action Committee (JAC) chuan an thil phut hrang hrangte tihhlawhtling tura sorkar phutin Thawhṭanni zan, zanlai aṭang khan darkar 48 awh nawrh an huaihawt.

JAC convener Maja­bung Gangmei chuan kar liam ta Inrinni khan sorkarah an thil phutte an thlen tawh tih sawiin, hma lak a la nih loh avangin nawrh an huaihawt ta tih a sawi. Sorkara an thil phut zingah hian Zaliangrong leader, Abonmai case chu National Investigation Agency (NIA) kuta hlan te, Tamenglong DC leh SP suspend bakah, Abonmai chhungte hnena zángnadawmna pekte a tel.

Thawhṭanni tlai khan JAC aiawhte chuan chief miniter N Biren Singh pawh an hmu a, mahse an thil phut chungchangah hun pek belh tura sorkarin lamin an ngen avangin an inbe rem thei lo a ni. State sorkar hian Tamenglong DC leh SP sawnna tur thupek hi a tichhuak tawh a, mahse JAC lam hian suspend an phut a ni.

Manipur home secre­tary Gyan Prakashbon chuan Abonmai case hi NIA hnena hlan chungchang pawh a ngaihtuah mek a, ministry of home affairs-a special secretary pawh lehkha an thawn tawh tih a sawi.

JAC chuan an thil phutte tihhlawhtlin a nih hma chuan Abonmai ruang chu RIMS morgue-ah a la awm chhunzawm zel dawn tih an sawi. Mahse CM nena a inbiak hnuah nimin khan autopsy tih an remti a, vui a nih hun tur erawh an la ngaihuah dawn tih an sawi a ni.

Imphal West-a Langol Tarung khuaah pawh Thawhṭanni khan hmeichhiaten Abonmai thattute man a, hremna pek phutin sit-in protest an huaihawt bawk.