Chuhtu awm loin RS member atan Sarbananda Sonowal tling

Assam-a Rajya Sabha inthlan neihah BJP candidate, union minister Sarbananda Sonowal chu chuhtu awm loin a tling

Parliament upper house member thlan turah hian party dangin candidate an siam loh avangin, nomination paper hnuhdawh theih hun tawp ni, Thawhṭanni khan returning officer chuan Sonowal chu a tling tih a puang a ni. Hemi ni vek hian Sonowal hian election certificate hi returning officer hnen aṭangin a la a, chief minister Himanta Biswa Sarma leh BJP state president Bhabesh Kalita-ten an ṭawiawm.

Assam-a rorellai, BJP hian Upper House-ah member pathum a nei a, a thawhpui Asom Gana Parishad (AGP)-in member pakhat a nei bawk.

Rajya Sabha-ah Assam hian seat pasarih a nei a, Congress-in seat hnih leh Independent MP pakhat an awm bawk a ni.

Sonowal chuan thlan tlin a nih thu puan a nih hnua chanchinthar lakhawmtute a kawmnaah, Assam state leh mipuite tan theihtawp a chhuah zel tur thu a sawi a, BJP hruaitu hrang hrang - prime minister Narendra Modi, national president JP Nadda, union home minister Amit Shah leh Assam CM Sarma-te chungah a lawm thu a sawi a, Assam mipui, a bikin Majuli bial mipuite'n an rintawkna chu lawmawm a ti takzet tih a sawi bawk.

Assam chief minister hlui, kum 59 mi Sonowal hi July thla khan prime minister Narendra Modi cabinet member-ah lakluh niin, minister for ports, shipping & Waterways leh ayush-ah dah a ni. Modi kaihhruai NDA sorkar hmasaah khan kum hnih chhung minister of state for sports and youth affairs a lo ni tawh bawk a ni.