Assam Speaker-in AP a tlawh

Assam Legislative Assembly speaker Biswajit Daimary chuan Thawhṭanni khan Arunachal Pradesh a tlawh a, AP-a National e-Vidhan (NeVA) project a zirchiang.

Daimary hi Barhampur MLA Jitu Goswani leh officer dangten an ṭawiawm a ni.

National e-Vidhan hi Assembly chungchanga information pekna, member-centric application a ni. Arunachal Pradesh hi hmarchhak state zingah he project hmang hmasa ber leh, ram chhungah state zinga a pathumna a ni a, ministry of parliamentary affairs chu project nodal ministry a ni.

He application hmang hian Legislative member-te chuan an tablet/laptop aṭangin House-a ngaihtuah tur list hrang hrang, zawhna leh document dangte pawh an en thei dawn a ni.

Arunachal Pradesh Legislative Assembly speaker Pasang D Sona leh deputy speaker Tesam Pongte-te chuan Daimary leh a team-te hi assembly-ah lo dawngsawngin, tradional scarf leh thilpek dangte an lo hlan. Hemi hnu hian meeting nei zuiin, speaker pahnihte hian NeVA project leh Commonwealth Parliamentary Association (CPA) India Region Zone III kaihhnawih thil hrang hrangte an sawidun.

Sona chuan NeVA project chu assembly-a paper hman ngaih lohna ringawt ni loin; hun, sum leh energy tam tak hum theihna a nih thu a sawi. He project hian assembly rorelna kawnga a puih bakah, paper hman tlem chuan envirnoment tihchhiat pawh nasa takin a tihtlem phah tih a sawi bawk. Assembly-ah chuan an paper hmante hman nawn leh a nih theihna turin paper recycling unit pawh dah a nih thu a sawi a ni.