Meghalaya-ah AFSPA hlip

Union Home Ministry chuan Thawhṭanni khan Meghalaya state pumpuiah Armed Forces (Special Powers) Act (AFSPA) hlih a nih thu a tarlang a, hetih lai hian Arunachal Pradesh-ah pawh police station pariat huamchhungah chiah hman a nih tawh thu an tarlang bawk.

Official thuchhuah chuan AFSPA chu Megha­la­ya state pumpuiah hman a ni dawn tawh lo tih a tarlan rual hian Arunachal-ah pawh police station 16 aṭangin police station pariatah chiah hman a ni tawh dawn tih an tarlang a, hei hi April 1 aṭang khan hmanṭan a ni tawh tih a tarlang.

Hetih lai hian AFSPA hi Arunachal Pradesh-a district pahthum Tirap, Longding leh Changlang, Myanmar nena an inrina-ah erawh thla ruk chhung pawhsei a ni thung a, heng district pathum te hi January 2016 aṭang khan Act hi hmanṭan a ni tawh a ni.

AFSPA hnuaiah hian sipai-te leh central force-te chuan warrant tel kher loin mi an dap thei a, an kap thei bawk a ni.

Nagaland, Assam leh Manipur (Imphal seven Assembly constituencies tel lo in) pumpui hi AFSPA hnuaiah hian a la awm a. Assam leh Manipur-ah chuan state sorkar kutah he Act hlih theihna hi dah a ni thung.