Arunachal Pradesh ALG-ah thlawhtheihna ṭum ta!

Arunachal Pradesh- a Pasighat khawpuia Advance Landing Ground (ALG)-ah Thawhṭanni chhun dar 12.30 khan thlawhtheihna Alliance aircraft – ATR 42 chu ṭum tir chhin a ni a, hlawh­tling takin a ṭum.

Chief Minister Pema Khandu chuan thlawhtheihna tluang taka ṭum chhin tir a ni chu lawmawm a tih thu sawiin Arunachal Pradesh chuan bung thar a kai a ni, a ti.

Pema Khandu chuan mipuite pawh a lawmpui thu a sawi a, state chhung a bik takin eastern leh central district-a cheng te chu he hlawhtlinna avang hian a lawmpui thu a sawi. Khandu chuan state in inkalpawhna lama chona lian ber mai a hmachhawn chu a hneh ta a ni, a ti bawk.

CM chuan state civil aviation department offi­cial-te hnenah lawmthu a hrilh bawk a, East Siang district administration, Air-Force, Indian Army, Directorate General of Civil Aviation (DGCA), Airport Authority of India (AAI), Bureau of Civil Aviation Security (BCAS), Ministry of Civil Aviation leh Pasighat mipuite chuan Alliance aircraft tluang taka a ṭum theih nana an theihtawp an chhuahpui avangin lawmthu a hrilh bawk a ni.

Thlawhtheihna hlawh­tling taka ṭum tir a nih lai hi DGCA, BCAS, AAI leh Alliance airlines offi­cials te bakah district thuneitute leh state aviation department officals-te pawhin an thlir bawk.

Chief Minister chuan Prime Minister Narendra Modi chuangah pawh Arunachal a ngaihsakna avangin a lawm thu a sawi bawk a ni.

Alliance aircraft crew member-te hian Guwahati aṭangin Pasighat hi an pan a, darkar hnih leh minute sawmhnih an thlawk.

Advance Landing Ground hi Pasighat, East Siang district-a awm a ni a, 2016 August thla khan hawn a ni tawh a, mahse Indian Air Force-ten hawn a nih hnu lawkah hian an cheiṭha lehnghal a ni.

Commercial Airlines ṭhenkhat Zoom Air leh True Jet-te chu August aṭang hian thlawhtir tum a ni bawk.