AFSPA hlih vangin Meghalaya lawm
Sorkar laipuii Meghalaya state aṭanga Armed Forces (Special Powers) Act a hlih avangin Thawhlehni khan political party hrang hrang, zirlai pawl leh kohhran hruaitute chuan lawmawm an tih thu an sawi.
Meghalaya home minister James K Sangma chuan AFSPA an hlih avangin sorkar laipui chungah an lawm takzet tih a sawi a, Meghalaya sorkarin a ngenna ngai pawimawha Garo Hills-a AFSPA a la hman a hlip ta chu lawmawm a tih thu sawiin Meghalaya police-te thawhrimna avangin helna chu an thunun thei niin a sawi bawk.
Congress party pawhin sorkar laipui thutlukna chu lawmawm an tih thu sawiin sorkar hmasa Mukul Sangma kaihhruai sorkar chu Act hlih a nih theihna atana bultumtu an nih thu an sawi ve thung.
Congress thupuangtu Zenith Sangma chuan Meghalaya state anga AFSPA hman hian ṭhat lohna tam tak a nei tih sawiin ṭawng vanga harsatna tam tak a awm ṭhin avangin chief minister hlui Mukul Sangma pawh khan Garo Hills-ah sipaite beihpui thlak a phal lo tih a sawi.
Mukul Sangma chuan state in anti-insurgency force a neih Special Force-10 hmangin state chhungah muanna a thlen thu a sawi bawk. Meghalaya chu mahni state puala anti-insurgency force nei thei hmasa ber an nih thu a sawi a ni.
North East Students Organisation (NESO) pawhin Home Ministry thutlukna chu lawmawm an tih thu sawiin, Meghalaya aṭanga AFSPA an hlip chu an lawm thu an sawi a, hmarchhak state zawng zawng aṭanga AFSPA hlih an duh thu an chairman Samuel B Jyrwa chuan a sawi.
Jyrwa chuan Act hian rah ṭha a chhuah loh thu leh mipuite tihduhdahna leh tualthahna bak a thlen lo tih a sawi bawk a, kum 27 chhung zet Meghalaya-a he Act hman a nih chhung khan rah ṭha pakhatmah a chhuah lo a ni, a ti.
Kohhran hruaitu ṭhin P B M Basaiawmoit pawhin Meghalaya aṭanga AFSPA lakkir a ni chu lawmawm a tih thu sawiin hmarchhak tan thu lawmawm tak a nih thu a sawi ve bawk a, India aṭanga he dan hi paihbo a nih phei chuan mipui zawng zawng an lawm hle dawn niin a sawi.