Arunachal Pradesh Congress-in AFSPA hlih vek ngiat

Sorkar laipuiin Thawhṭanni-a Arunachal Pradesh hmun ṭhenkhata Armed Forces (Special Powers) Act a hlih laiin hmun ṭhenkhatah erawh a la pawhsei thu thuchhuah a siam chu Arunachal Pradesh Congress Party chuan an duh loh thu sawiin, Arunachal aṭanga AFSPA hlih vek an phut thu an sawi.

State Congress pre­sident Takam Sanjoy chuan Arunachal Pradesh ang state ralmuangah AFSPA hman a ngai tawh lo tih a sawi a, Meghalaya-ah pawh sorkar laipuiin a hlip vek a, engatinge Arunachal-ah a hlih ve loh tiin sorkar laipui chu a zawt let a ni.

Sanjoy chuan Aruna­chal-ah kum eng emaw zat chhung helna leh buaina a chhuah tawh loh thu a sawi a, thildang ngaihtuah tur a tam laia AFSPA hlih vek a la ni lo chuan mipui ralmuanna a tichiai zawk niin a sawi.

Congress president chuan Naga hel pawl nena remna zawnga inbiakna neih a nih laiin Act hi an pawt sei leh niin a sawi bawk.

Home Ministry chuan Thawhṭanni khan thuchhuah siamin Me­gha­laya state pumpui aṭangin AFSPA hlih a nih thu a puang a, Arunachal Pradesh-ah pawh police station 16 aṭangin police station pariat huamchhungah leh district pathum - Tirap, Changlang lehLongding district-ah te chiah he Act hi hman a ni tawh dawn tih a puang bawk a ni.

Arunachal-a rorel lai BJP chuan sorkar laipui chuan state chhung din­hmun chiang takin zir se, an remti a nih chuan ralmuanna a awm zawk theih nan Act hi hlip ve se an duh thu an tarlang ve bawk.

State BJP president Tapir Gao chuan hmar­chhakah anti-nationalist lam thil a awm tih chu phat rual a ni lo tih sawiin sorkar laipuiin rem a ti a nih chuan, Act hi an hnukkir thei a ni, a ti.

Arunachal People's Party hotu Kahfa Bengia pawhin police station pariat huamchhunga AFSPA la hman chu a ṭul tawh loh thu sawiin hunrei tak chhung hel pawl chetna report a awm tawh loh thu a sawi bawk.