Manipur: KSA in MPSC chairman leh secretary ban an ngiat

Manipur-a Kangleipak Student’s Association (KSA) chuan nimin khan Manipur Public Service Commission (MPSC) Chairman leh Secretary chu NG College-a West Bengal mi Principal-a an dah vangin bang tura an duh thu sawiin MPSC criteria kalhin an che niin an sawi.

Zirlai pawl chuan sorkar college principal laknaa screening mumal lo a awm chu an dodal tlat thu an sawi a, principal atana state dang mi an ruat duh loh nan hian sit-in protest an nei a ni.

November 9 , 2017-a MPSC thuchhuah siam chuan Howrah mi Gopal Chandra Bag chu college principal atana lak a nih thu an tarlang a, hei hi KSA chuan an duh lo hle a ni.

KSA President Ning­thoujam Chetan chuan vawi eng emaw zat dan kalha hna an lak tawh avangin MPSC lakah vawi tam tak lungawi lohna an lo lantir tawh thu a sawi a, heti chung hian state thuneitute chuan aw an la chhuah duh lo niin a sawi.

Chetan chuan principal an thlan dan chuan MPSC hna lak dan criteria, serial number three a inziak, Manipur-a cheng a ni tur a ni tih chu a kalh thu a sawi bawk.Khawi aṭanga Mani­pur permanent residen­tial certificate (PRC) nei nge a ni tih zawt bawkin Chetan chuan Gopal chuan mi in a luah thu a sawi a, PRC nei tur chuan state chhungah an­mah­ni hming ngeia ram an neih a ngai tih a sawi a ni.