Assam-in Nov 1 aṭangin Covid khuahkhirhna hlip vek dawn

Assam sorkar chuan Covid-19 hri leng vanga khuahkhirhna a siamte chu November 1-ah hlih vek a tum.

Chief minister Himanta Biswa Sarma chuan a kaihhruai sorkar chuan November 1 aṭangin khuahkhirhna siamte tihtawp vek a, tourism industry lam pawh tuaithar leh an tum tih a sawi. State chhunga hri leng dinhmun chuan ziaawm lam a pan zel tawh tih a sawi bawk.

CM chuan Covid-19 hri lengin tourism industry chu a nghawng na hle tih sawiin, hei vang hian state sorkar chhawmdawlna pawh a siamsak a ni, a ti. Hripui leng vanga an eizawnna hna thawk thei loa hun rei tak awm tawh, tour operator 142-te chu Rs nuai hnih ṭheuh pek an ni dawn a, tour guide 605 pawh Rs 25,000 ṭheuh sorkar chuan a pe dawn bawk a ni.

State mipui a tam thei ang berin Covid vaccine an lak theihna turin sorkar chuan theihtawp a chhuah zel dawn tih Sarma chuan a sawi. Kum 2022-ah chuan Covid chu mipuite tana hlauhawm leh eizawnna tibuai khawp a nih tawh loh a beisei thu leh, CM chuan tourism industry pawhin ngai a awh chhoh leh thuai a a beisei tih a sawi.

Sarma chuan Assam chhunga khualzinte an la tlawh chhuah tam loh hmunte chu chawi lar a ṭul thu sawiin, stakeholder-te pawh Kaziranga National Park leh hmun lar sa dangte chauha insawrbing lo turin a chah. "Kan state chaw, handloom, handicraft, tribal culture leh kan ram leilung mawinate chu khualzinte hnenah kan vawrh lar a ṭul a ni," a ti. Tour operator-te chu Dima Hasao, Karbi Anglong, Bodoland Territorial Region (BTR) leh state chhung hmun dangte chu theihtawpa tilar zel turin a chah bawk.

Indian Railways-in Guwahati-New Haflong-a Vistadome service a kalpui chu lawmawm a tih thu sawiin, hei hian hill station pawh tihlar phah dawn hle a ni, a ti.