Abonmai case : Manipur police-ten mi 2 man tawh
Manipur-a Naga leader, Zelianrong Baudi president hlui Athuan Abonmai thah a nih chungchangah tualthahnaa inhnamhnawiha rinhlelh mi pahnih chu Manipur police-ten an man.
Mi pahnih mante hi Ponthalung Panmei (47),Kanthoujam Maning Tribal Colony-a cheng leh Lanchapou Bosco Gonmei (48), Langol Laimanai-a cheng an ni. Man an nih hnu hian CJM Imphal West Judge hmaah hruai nghal an ni a, ni kua chhung judicial custody-a awm tura tih an ni.
Police-te hian Abonmai ruang an hmuhna bulah hian tuboh an hmu tel a, hei hi tualthahna hmanrua atana an hman tel nia rin a ni. Abonmai hi a taksaah hliam eng emaw zat a tuar bakah, a lu pawh thuk takah a kak bawk, a thatute hian an tihhlum hmain na takin an nghaisa niin police-te chuan an sawi.
Manipur-a Naga pawl hrang hrangte chuan Abonmai thah a nih chungchanga lungawi lohna pawh lantirin, tualthattute zawngchhuak thuai a, hremna pe turin sorkar an phut. Hei bakah police-te awm lai renga rukbo a nih avangin he thilah hian Tamenglong SP leh DC chu suspend an phut.
Chief minister N Biren Singh ngei pawhin he thil hi police-te inthlahdah avanga thleng nia a lan theih thu a sawi bawk a, Abonmai chhungte hnenah pawh ngaihdam a lo dil tawh a ni.