Manipur CM-in Super IAS 500 scheme a puang

Manipur chief minis­ter N Biren Singh chuan an state aṭanga IAS nih tum, ṭhalai lehkhathiamte puihna tur scholarship programme, Super IAS 500 scheme siam anih thu a puang.

Scholarship scheme atan hian cheng vaibel­chhe 2.8 rua­hmanin, Chief Minister’s Scholarship Scheme for Civil Services Aspirants hnuaiah coaching class buatsaih sak an ni ang. CM chuan he programme hi civil service exam tum tam takin an chhawr thei dawn tih sawiin, coaching class kal tura sum tam tak senga state pawn lam an pan ṭhin chu a ngai tawh dawn lo a ni, a ti.

CM chuan Alternative Learning System (ALS), Delhi aṭangin IAS mentor ṭha ber berte chuan state sorkar bultumin State Academy of Training (SAT), Takyelpat-ah coaching class an pe ṭhin dawn tih sawiin, a thawh khatna chu November 8 aṭanga nakkum April 30 thleng neih a ni dawn tih a sawi. Heta aṭanga civil service preliminary examination paltlangte chu main examination an inbuatsaihna turah a thlawnin main crash course siamsak leh test-te neihpui leh an ni dawn bawk tih a sawi.

Singh chuan UPSC examination inbuatsaihna atana coaching class neihna tur, hostel awm nghalna permanent complex chu state sorkarin sak a tum tih a sawi bawk.