Assam in minister thar pasarih nei Tribal pawl ṭhenkhatin an dodal

Assam Chief Minister Sarbanada Sonowal chuan Ningani khan a council of minister huang zauhin minister thar pasarih a lakluh belh a, hetih lai hian tribal pawl ṭhenkhat erawh chuan BJP MLA Rama Kanta Deuri minister zinga telh a nih ve lo chu an duh lohzia lantir nan vawiin hian bandh an huaihawt dawn thung.

Minister lakluh thar zinga pali hi Cabinet mi­nister niin pathum hi minister of state an ni ve thung a ni.

Ningani khan Governor Jagdish Mukhi chuan Raj Bha­wan chuan Siddhartha Bha­ttacharyya, Som Ronghang, Asom Gana Parishad (AGP) MLA Phani Bhushan Choudhury leh Bodoland People’s Front (BPF) MLA Chandan Brahma-te chu cabinet minister tura rinawmna thu tiamtir in Tapan Gogoi, Pijush Hazarika leh Bhabesh Kalita te chu minister of state ni turin rinawmna thu a tiamtir.

Sonowal-a kaihhruai sorkar hi May 24, 2016 khan cabinet minister pakua leh minister of state pahnih, chief minister telin rinawmna thu tiamtir an ni a, Assam hian Minister 19 an nei thei a ni. Ningani khan minister thar pasarih lakluh belh ni mah se minister post khat hnawhkhah lohin a la awm a ni.

Tiwas National Solidarity Forum (TNSF) leh hnam bil pawl hrang hrangte chuan Morigaon-ah ministry-a Deuri telh a nih loh avangin darkar 12 chhung central Assam-ah bandh an huaihawt dawn.

TNSF hian Assembly inthlan hnuhnung berah khan BJP hi an thlawp a, Deuri leh MLA dang panga te chu BJP ticket in central Assam-ah hian an tling nghe nghe a ni.

TNSF, All Tiwa Stu­dents Union, Chutiya Sanmilan leh Koch-Rajbongshi Sanmilan te chuan thuchhuah inṭawm siamin BJP in an phatsanah an ngaih thu an sawi a, Deuri Autonomous Council chief executive member hlui Deuri chu an hlamchhiah niin an sawi.

Heng pawl pathum-te hian BJP president Amit Shah, Sono­wal leh minister Himanta Biswa Sarma-te chuan Assam Assembly inthlan hma khan New Delhi-ah Deuri hi Cabinet dinhmuna hlangkai an tiam niin an sawi.

TNSP leh tribal pawl te hian Chief Minister leh Sarma lim te an hal bawk a ni.