Bhaichung-a'n ‘Hamro Sikkim Party’ tlangzarh

India national football team captain hlui Bhaichung Bhutia chuan Ningani khan a political party din thar ‘Hamro Sikkim Party’chu a tlangzarh.

Bhutia chuan Trinamool Congress-ah a tel lai khan pawnlam mi ni tlata inhriatna a neih thu leh a lungthlu zan lo tih a sawi a, a party tlang­zarh erawh hi chu Sikkim nen a inmil thlap dawn tih a sawi.

Bhaichung chuan West Bengal politics mai bakah Bengal club tan kum tam tak khel tawh mah se pawnlam mi ni tlata inhriatna a neih chu a reh theih loh thu sawiin a pianna hmunah a kir leh ta niin a sawi a, TMC tana Siliguri-a a din pawh khan a lungthlu zan lo tih a sawi bawk.

Bhutia chuan lungthlu zan lo a TMC-a tel reng chu a tan awmzia a awm lo tih a sawi a ni.

Tunah chuan a pianna hmunah a let leh tawh thu sawiin, a chhungkua leh a in chu Sikkim-ah ngei a awm thu a sawi a, ram leilung fapa ngei a nihnaah a kir leh thu sawiin a theihna pawh nasa zawka a hman theih zawk ngei a rin thu a sawi.

Bhutia chuan West Ben­gal Assembly inthlan hnu lawkah khan TMC nen Gor­kha­land issue-ah ngaihdan inang lo an neih thu a sawi a, Gorkhaland chungchangah hian ngaihdan inang lo tak tak pahnih khat an nei tih sawiin TMC ṭanna chu a pawmpui theih loh thu a sawi bawk a ni.