Meghalaya : Williamnagar-ah inthlang

Meghalaya East Garo Hills-a Williamnagar Assembly inthlanna chu nimin khan neih a ni a, he thu ziah lai hian chanchin kimchang hriat a la ni lo thung.

Williamnagar-a inthlanna hi boruak ral­muang tak hnuaiah neih ṭan niin venhimna khauh tak hnuaiah nimin zing dar 7 aṭang khan vote thlak ṭan a ni.

Meghalaya Assembly inthlan hi constituency dang zawng zawngah chuan February 27 khan neih a ni tawh a, Wi­lliamnagar-ah erawh hi chuan inthlan dawn ṭep, February 18 khan NCP candidate Jonathone N Sangma chu hel pawl ten IED bomb hmanga beia an thah avangin inthlan hun hi sawn tlai a ni a, nimin khan an inthlang ve thei chauh a ni.

Williamnagar con­stituency-ah hian National People's party aiawhin MLA hlui Marcuis N Marak a ding a, Congress aiawhin Deborah C Marak a ding thung a, hel kuta nunna chan ta Jonathone N Sangma nupui Krenila Marak chu a pasal hnungzuiin NCP candidate a ni thung.

National People’s Party (NPP), BJP, United Democratic Party leh NCP-te hi rorel lai Me­ghalaya Democratic Alliance hnuaia mi vek ni mah se inthlanah hian a hrang ṭheuhin an ding a ni.

Meghalaya Assembly inthlanah khan NPP-te chuan BJP leh regional party-te nena ṭangkawpin sorkarna an siam a, Conrad Sangma chuan Chief Minister ni tura rinawmna thu March thla khan a lo tiam tawh bawk. Congress chu party mala seat la hnem ber niin seat 21 lai la mah se NPP leh an thurualpui te hian sorkarna an siam thung.