Tripura CM in ‘Diana Hayden’ Chungchanga a thusawi pawiti

Tripura Chief Minister Biplap Kumar Deb chuan Zirtawpni khan kum 21 liamtaa 'Miss World' crown an khumtir, ‘Diana Hayden’chungchanga a thusawi chu pawi a tih thu a sawi.

Biplap Kumar Deb chuan state chhungah handloom market in hma a sawn theih dan tur chungchang a sawi thu sawiin, mi rilru a ti na a nih chuan pawi a tih thu a sawi a, hmeichhia zawng zawng chu a nu ang maia a zah thu a sawi bawk.

Deb hian kar hmasa khan kum 21 liamtaa ‘Diana Hayden’-i 'Miss World' a thlan a ni chu a hriatthiam loh thu leh thutlukna siam a nih dan a hriatthiam loh thu a sawi a, Miss World thlanna chu thil ho tak leh lemchan mai niin a sawi a ni. Hetih lai hian 1994-a Aishwarya Rai-i Miss World-a thlan a ni chu a fak thung a, India hmeichhe diktak nihna a lantir thu a sawi thung.

Diana Hayden a sawisel avang hian internet lamah nasa taka sawisel a ni a, Tripura CM hlui Manik Sarkar-a nupui Panchali Bhattacharjee pawhin Deb-a thusawi dan chu an rin loh lam lutuk a nih thu a sawi a, beauty pageant winner-te chuan nasa taka an beih ṭhin thu a sawi.

Tripura Femina Miss India contestant Mamita Debbarma pawhin an chief minister in hetiang thil a sawi chu pawi a tih thu a sawi ve bawk.

State Congress vice president leh social worker ni bawk Basana Debnath chuan Diana Hayden chu Indian a nih thu leh chief minister thusawi chuan hlutna a nei lo tih a sawi a, Diana Hayden ngei pawh hian lo chhanglet tawh nghe nghe.

Anni bakah hian mi langsar tak takin Chief Minister thusawi hi nasa takin an sawisel a ni.

Deb hian tun thla tir lamah khan Internet leh satellite communication-te hi Mahabha­rata hunlai khan a awm tih a sawi chuan internet lamah nasa takin sawisel a lo ni tawh bawk.

Zirtawpni vek khan Agar­tala-a Prajna Bhavan-a Civil Service Day-a thu a sawinaah Deb hian Civil Engineer-te chuan society siamṭhat kawngah leh administration lamah experience leh thiamna an neih avangin Civil Service ni se a tih thu leh mechanical engineer-te erawh chuan an thei ve lo nia a sawi chuan titi a ti tam hle bawk a ni.