Tripura srokar in Chit Fund Scam case 74 CBI kutah hlan dawn

Tripura sorkar chuan Rose valley- chit fund scam case zawng zawng, case 74 chu Central Bureau of Investigation (CBI) kutah an hlan dawn tih official thuchhuah chuan a tarlang.

Heng case-te hi tunah hian Special Investigation Team (SIT) kutah a awm mek a ni.

CBI hian a hmain Tripura High Court hnenah case 11 chu an kuta hlan turin an lo ngen tawh a, mahse Tripura sorkar chuan case zawng zawng hi hlan pawi an tih loh thu an sawi.

Chit Fund Scam case leh non-banking financial company-te chhui tur hian Tripura High Court chuan 2015 khan Special Investigation Team (SIT) a din a, SIT hi Inspector General of Police K V Srijesh chuan a kaihruai a ni.

K V Srijesh chuan inves­tigation an zawh ṭep tawh thu sawiin case pasarih-pariat vel chiah pending a awm tawh tih a sawi a, tunah state sorkar in a vaia CBI kuta hlan leh si an tum tih sawiin anni lam aṭang chuan sawi belh tur a awm lo tih a sawi.

Social Welfare Minister hlui Bijita Nath leh ex-Finance Minister Badal Chowdhury te chu kar kalta Nilaini leh Zirtawpni khan CBI chuan Chit Fund scam case chungchangah hian thu an lo zawtfiah tawh bawk a, anni pawh hian ṭha taka an zawhna te an chhan thu an sawi a ni. Anni pahnih hi tunah hian MLA nilai an ni.

Hetih lai hian CPI-M lam chuan an party mi leh sa he case-a inhnamhnawih hi an awm loh thu sawiin CBI chu sorkar laipui hmanrua mai an nih thu an sawi thung.