Covid-19 : Hmarchhak dinhmun

Arunachal Pradesh-ah hri kai paruk hmuh belh niin, hri kai hmuh tawh hi mi 57 an ni a, an zinga pakhat chu enkawl dam a ni tawh. 

Hri kai hmuh tharte hi Changlang district-ah mi pathum; Lower Dibang Valley, Tirap leh East Siang-ah mi pakhat ṭheuh an ni a, Covid Care Centre (CCC) ah dah nghal an ni. 

Manipur-ah Pathiannia sample test zingah Covid-19 kai hmuh an awm loh hnuah, Thawhṭannia sample test zinga 63-in hri an kai tih hmuh chhuah leh a ni. Hri kai hmuh chhuah tharte hi state dang aṭanga haw vek an ni. Manipur-ah hian hri kai hmuh tawh hi mi 272 an awm tawh. 

Hri kai hmuh thar mi 63 zinga mi 34 chu Bishnupur district-a mi an ni a, Kakching mi 18, Ukhrul, Senapati leh Imphal West district-ah pahnih ṭheuh leh Kongkokpi leh Noney district-a mi pakhat ve ve an ni. 

Hri kai enkawl dam pawh an pung chho zel a, enkawl dam hi mi 58 an awm tawh a ni. 

Assam-ah Covid-19 kai hmuh belh zel an ni a, nimin thleng khan he hri kai hmuh tawh hi mi 2,866 an awm tawh. 

Hri kai an pun belh zel avangin Containment Zone pawh eng emaw zat puan niin, khar an ni tawh a ni. Kamrup (Metro) district-ah chuan Containment Zone 19 a awm tawh a ni. 

Assam-a hri kai hmuh tawh zinga 784 chu enkawl dam an ni tawh a, hri kai mek hi 2,044 an awm. 

Meghalaya chief minister Conrad K Sangma chuan Thawhṭanni zan khan an state-ah Covid-19 kai pathum hmuh belh an ni tih a sawi a, hri kai hmuh tawh hi mi 39 an tling tawh a ni. 

Hri kai hmuh tharte hi Jowai-a mi an ni a, Delhi leh Uttarakhand aṭanga rawn haw an ni. An pathum hian quarantine centre-a awm lai an nih thu Chief Minister chuan a sawi bawk. Meghalaya-a hri kai hmuh tawh zinga 13 chu enkawl dam an ni tawh a ni. 

Nimin khan Nagaland-ah hri kai hmuh chhuah mi panga an awm belh leh a, an state-a Covid-19 kai hmuh tawh hi mi 127 an awm tawh a ni. 

Health minister S Pangyu Phom chuan nimina sample 333 test zingah panga an positive tih sawiin, heng mite hi Dimapur quarantine centre-a awm mi pali leh Kohima quarantine centre-a awm mi pakhat an ni tih a sawi. Hri kai hmuh tawh zinga pariat chu enkawl dam an ni tawh tih a sawi nghal bawk. 

Tripura-ah coronavirus kai mi 38 hmuh belh leh niin, heng mite nen an state-a hri ka hmuh chhuah tawh hi mi 841 an tling tawh. 

Hri kai zinga 192 chu enkawl dam an ni a, damdawi-in aṭangin chhuah tir an ni tawh a ni. Mi 645 te enkawl mek an la ni. 

Thawhṭanni khan sample 1,480 test a ni a, heng zinga 38 chu an positive a ni. Hri kai hmuh tharte hi Sepahijala district-a mi an ni a, Chennai aṭanga rela haw vek an ni.