Assam-in Oct 19 aṭangin primary school hawng dawn

Assam sorkar chuan October 19 aṭangin Class 1-VIII zirlaite chu school a kal tir tawh dawn.

Sorkarin thuchhuah a siam tharah, hrilengin ziaawm lam a pan zel avangin primary school pawh hawn a ni tawh dawn tih a sawi a, mahse zirna inah hian Covid-19 kaihhruaina hrang hrangte ṭha taka zawm vek a ni ang, a ti.

Class I-III chu Thawhṭanni, Nilaini leh Zirtawpniah an kal ang a, Class IV leh V-te Thawhlehni, Ningani leh Inrinniah an kal thung ang. Upper primary (Cl VI-VIII) pawh kar khatah ni thum kalin, Class VI zirlaite chu Thawhṭanni, Nilaini leh Zirtawpniah an kal dawn a, Class VII-te Thawhlehni, Ningani leh Inrinniah, Class VIII zirlaite Nilaini, Zirtawpni leh Inrinniah an kal ang.

School hawn hunah pawh section khatah zirlai naupang 30 aia tam a ruala an awm phal a ni dawn lo a, zirlai an tam dan azirin section pawh siambelh mai turin school hotute chu hriattir an ni. Zirlai naupangte chu kal ngei ngei tura nawr luih an ni lo a, nu leh pate remtihna lak a ngai dawn a ni.

September 20 khan Class 10 zirlaite chu school kal ṭantir an ni tawh a, September 6 khan Class XII leh college leh university-a final year degree leh postgraduate zirlaite pawhin dan pangngaia zirna hi an chhunzawm tawh bawk.