Hmarchhak state 3-ah hna sang chelhtu hmeichhia an tam
India ram chhung hmun dang aiin hmarchhak state-ah hmeichhia, an hnathawhna hmuna hotu dinhmun chelh an tam.
Periodic Labour Force Survey-in a tarlan danin, kum 2019-20 chhung khan hmarchhak state pathum - Meghalaya, Sikkim leh Mizoram chu managerial post chelhtu hmeichhia tam zualna an ni.
Meghalaya chu India ram state zinga hmeichhia, managerial post chelhtu san berna niin, 34.1% an awm. Sikkim-in dawtin 33.5% an awm a, Mizoram chu a pathumna niin 33.2% an awm bawk.. Hmeichhe managerial post chelhtu tamna zingah hian Andhra Pradesh chu palina niin 32.3% an awm a, Punjab-in dawtin 32.1% an awm ve bawk. Hmarchhak state dang, Assam chu a hniamna ber a ni thung a, 6.9% chiah an la awm a ni.
Hetih lai hian ram pum huap chuan hmeichhia, managerial post chelh zat hi 18.7% chauh a la ni thung.
Literacy rate leh technical lama hmeichhe hnathawk tam lamah Meghalaya chu India ram zingah a sang ber a ni bawk. Hmeichhe ziak leh chhiar thiam tam lamah hmarchhak state chu state dangte aiin an sang hlawm bawk a ni.
Hmeichhiate zinga legislator, senior official leh manager chelh tam lamah Manipur chu a sang ber bawk a, 51.8% an awm a, Meghalaya-in dawtin 51.7% an awm a, Sikkim-ah 50.4% leh Andhra Pradesh-ah 47.9% an awm bawk.