HC-in Tripura sorkar hnenah show cause notice pe

Tripura High Court chuan Agartala-a police station area pahnih huamchhunga Section 144 puan anih chungchangah Tripura sorkar chu show-cause notice a pe.

West Tripura district magistrate chuan September 20-November 4, 2021 inkar chhungin political party-ten punkhawm leh meeting an neih khapna thupek a tichhuak a, Durga puja leh Diwali festival a thlen dawn avangin mipuite himna tur leh, punkhawm buatsaih chuan hri leng thawh thumna a thlen a hlauhawm avangin heng khapna hi siam a nih thu a sawi.

Hetih lai hian magistrate thupek tihchhuah chungchangah Samarjit Bhattacharjee chuan High Court-ah petition thehlutin, mipuite fundamental rights palzutna niin a sawi a ni.

High Court chuan Nilaini khan petition hi ngaihtuahin, sorkar chu October 5 hmaa insawifiah turin a hriattir nghal a, hemi ni vek hian hearing hi neih chhunzawm leh a ni ang.