Assam cabinet-in microfinance loan rulhsakna tur pawm

Assam cabinet meeting chuan hmeichhiate microfinance loan lak rulhsakna turin cheng vaibelchhe 1,800 a pawm a, hei bakah hian Cachar leh Nagaon-a Hindustan Paper Corportion Ltd (HPCL) paper mills tihtawp taka thawktute chhawmdawlna turin Rs vaibelchhe 700 a pawm bawk. Cabinet meeting hi a ṭum khatna atan Guwahati khawpui ni loah neih a ni a, Dhemaji-ah an nei a ni.

Meeting zawhna chanchinbu mite a kawmnaah, chief minister Himanta Biswa Sarma chuan loan latute ba rulhsakna turin a thawh khatna atan Rs vbc 1,800 pawm phawt a nih thu a sawi. Loan ba an ngaihdam turte hi microfinance loan latu hmeichhia, regular taka an loan rul ṭhinte an nih thu a sawi. He hamṭhatna hi hmeichhia nuai 11 velin an chhawr thei dawn a, an loan rulhsakna tur hian Rs 25,000 thleng pek a ni ang. December 1-ah cheque hi pekchhuak ṭan a ni ang.

CM chuan, "HPCL mills pahnih tan Rs vbc 700 pawm a ni bawk. Hemi aṭanga Rs vbc 570 chu thawktu 1,100-te hlawh leh ba dang pekna atan hman a ni ang," a ti. A bak chu bill hrang hrang pekna tura hman a nih tur thu a sawi bawk.

State sorkar chuan HPCL-a thawk, ṭhalai 100-te chu sorkar hna a pe dawn a, HPCL-a doctor leh paramedical staff-te pawh sorkar hna siamsak an ni dawn tih CM chuan a sawi. HPCL-a thawkte pual hian cabinet chuan fund, Rs vbc 10 pek a remti bawk a ni.

HPCL hmanruate chu state sorkarin a lakchhawn theihna turin National Company Law Tribunal (NCLT) pawh an be mek tih sawiin, thil ṭulte tihfel a nih hunah paper mills pahnihte hi state sorkar kutah a awm tawh dawn a ni.