Nagaland-in Nov 1 aṭangin school hawng vek dawn

Nagaland sorkar chuan an state chhunga hri lengin ziaawm lam a pan zel avangin November 1 aṭangin school hawng vek a ni tawh dawn tih a puang.

High Powered Committee on Covid-19 chuan kar eng emaw chen chu weekly positivity rate pawh 3% hnuai lamah a awm tawh tih sawiin, nimin aṭang khan October 31 thlenga hman tur Unlock-7 pawh hman ṭan a ni bawk.

Minister of planning and coordination, land revenue and parliamentary affairs, Neiba Kronu chuan November 1 aṭangin class tinten school an kal chhunzawm thei tawh dawn tih a sawi a, hemi atan hian zirna -in hrang hrangte chu thla khat chhung inbuatsaihna hun pek an ni, a ti.

Minister chuan mipuite Covid kaihhruaina dante an zawm ṭhat chuan, social service leh punkhawmte phal a ni tawh dawn a, biak-in leh sakhaw hmun dangah pawh 100% capacity-a awmkhawm phal a ni tawh dawn tih a sawi. Infiamna lamah pawh khuahkhirhnate thlahdul a ni bawk a ni.

State chhungah khuahkhirhna hrang hrangte thlahdul chhoh ni mah se, state pawn aṭanga lutte chu entry point-ah screening neih chhunzawm zel ala ni dawn tih minister chuan a sawi.

December thlaa Hornbill festival buatsaih dan tur pawh sawiho thuai ni dawn tih sawiin, eng angin nge kalpui a nih dawn leh, festival hi ni eng zat nge neih a ni dawn tihte an sawiho dawn tih Kronu chuan a sawi. Hornbill festival hi kumtin buatsaih ni ṭhinin ni 10 a awh ṭhin a, nikum khan hri leng vangin virtual hmanga neih a nih bakah, a lawm hun pawh tihtawi a ni bawk.