Meghalaya CM hlui leh Congress MLA-ten TMC zawm an tum

Meghalaya chief minister hlui leh Congrsess hruaitu hlui, Mukul Sangma chuan Trinamool Congress (TMC) party a zawm dawn a, a rual hian Congress MLA dang 13 vel pawhin TMC-ah hian an lut dawn nia sawi a ni.

TMC lam chuan Mukul Sangma leh MLA dangte an party-a an luh tur thu hi sawiin, an puang zar thuai dawn niin an tarlang.

West Bengal-a rorellai, TMC hian state dangah huang zauh tumin hma a la nasa hle a, party hruaitute pawh state dangte tlawhin Tripura lamah pawh boruak an nei lian chho sawt hle. September 21 khan Sangma hian TMC MP leh party general secretary Abhishek Banerjee pawh a lo hmu tawh a, TMC-ah a lut dawn nia sawi thawm hi a awm ṭan a ni. Mahse a hnuah Sangma hian TMC lam sawmna hi hnarin, party thar a din dawn nia report a awm leh a ni.

Mahse TMC lam chuan Sangma leh Congress hruaitu ṭhenkhatte hi meeting an neihpui thu leh, a part-ah an lut dawn tih hi an sawi thung. TMC team pawhin Meghalaya hi an pan thuai tur thu an sawi.

Meghalaya assembly inthlan hi kum 2023-ah neih a ni dawn a, tun thla ni 30 hian assembly bial pathumah by-election neih a ni bawk ang.