Prime Minister in Tripura CM ko

Prime Minister Narendra Modi chuan Tripura Chief Minister Biplap Kumar Deb chu tunhnaia inhnialna chawkchhuak thei zawnga thu a sawi fo avangin New Delhi-a a office-a hmu turin a ko.

BJP hruaitu hlun tak pakhat chuan Pathianni khan PM Modi-an Tripura

CM Deb chu May 2-ah New Delhi-a amah leh BJP President Amit Shah hmu turin a ko tih a sawi.

March thlaa Chief Minister charge la, Biplap Kuamr Deb hian tunhnaiah inhnialna chawkchhuak thei thil eng eng emaw sawiin, ramchhung hmun hrang hrangah sawisel a hlawh nasa hle a ni.

Deb hian tunhnai lawkah khan Mahabharata hunlaiin Internet leh satellite communication a awm tih a sawi avanga nasa taka sawisel a hlawh laiin kar liamta lawk khan kum 21 liamta, 1997-a Miss World-a Diana Hayden thlan a ni chu a hriattiam loh thu leh judgement an pek dan a hriatthiam loh thu a sawi leh bawk.

Diana Hayden chungchanga a thusawi nasa taka sawisel a nih lai mekin Zirtawpni liamta lawk khan Civil service day, Agartala-a hmannaa thu a sawinaah civil engineer-te chu civil service officer ni tura fuih laiin mechanical engineer-te chu ni ve lo turin a ti leh thung a, hei vang hian nasa taka sawisel a hlawh zui leh bawk a ni.

BJP hruaitu hlun tak pakhat chuan Deb-a thusawi te avang hian party hruaitu hlunte chu an lu a hai hle tih sawiin Tripura CM chu a duh duh sawiah a puh a, Modi pawh a be dawn a ni, a ti.