Manipur : Moreh-ah Swaachh Bharat Abhiyan hlawhchham

Workers and Traders Association (WATA), Moreh-a voluntary pawl, Indo-Myanmar border khua Moreh tihfaina kawnga hmala ṭhin chuan Swaachh Bharat Abhiyan mission chu Moreh-ah chuan a hlawhchham hle niin an sawi.

WATA general secretary Ningthoujam Bala Devi chuan Swaachh Bharat Abhiyan (Clean India campaign) chu Moreh-ah kalpui ṭhat a ni lo hle niin a sawi a, tun dinhmunah chuan bawlhhlawh paihna hmun an nei lo chu hmalakna tur lian tak a nih thu a sawi a, bawlhhlawh paihna mumal tak neih chu sub-division thuneitute mawhphurhna a nih thu a sawi bawk.

Bala chuan Moreh faina kawnga hmalakna tur hrang hrang leh bawlhhlawh paihna hmun tur mamawh a nih thu pawh thuneitu lamah vawi eng emaw zat an thlen tawh thu a sawi a, mahse sorkar lam chuan an beng an chhu ngawng tlat niin a sawi a ni.

WATA hi Moreh khua te chuan an ngaihlu hle a, 2015 aṭang khan zantin dar 7 aṭanga dar 11 thleng khaw tihfai hna an thawk ṭhin a ni.

Bala chuan WATA chu Registrar Cooperatives Societies Act hnuaia din a nih thu sawiin tunah hian volunteer mi 75 an awm tawh thu a sawi a, an hnathawh te kalpui zel a nih theih nan dawrkai leh dawr neitu ten cheng 10 ṭheuh nitin an thawhkhawm ṭhin thu a sawi bawk.