Assam petrol union nawrh avangin Meghalaya-ah petrol awm lo

Assam Petroleum Mazdoor Union-ten April 26 aṭanga ni thum chhung nawrh an huaihawt avangin

Meghalaya hmun tam takah petrol lak tur a awm lo a, nunphung a tibuai hle a, Pathianni khan an nawrh hi an titawp chauh a ni.

Assam Petroleum Mazdoor Union hian hlawh sang zawk ngiatin nawrh an huaihawt a, Pathianni-a an nawrh an tihtawp avang hian Meghalaya-ah pawh nunphung a pangngai leh thuai beisei a ni bawk.

Meghalaya hi tlangram a nih ve tho avangin kawngpui hmanga inkalpawhnaah hian an innghat nasa hle a,

Assam-a petrol union emaw tanker's union emaw ten nawrh an huaihawt hian a tuar nasa ber zingah an tel ṭhin a ni.

Meghalaya state chhunga tankers’ unions, dealer-te leh customer-te chuan state sorkar chu an harsatna tawh meka hma la turin an nawr a, union chuan state sorkar chu Indian Oil Corporation Umiam depot khar tawh hnu chu hawng leh turin an nawr nghal bawk.

Umiam depot-ah hian state in harsatna a tawh huna hman tur ni 30 daih petrol an stock ṭhin a ni.

Union petroleum minister Dharmendra Pradhan-an Meghalaya a tlawh ṭum khan khatih hunlaia chief minister Mukul Sangma pawh khan depot hawn leh a nih theih dan tur chungchang hi a lo sawipui tawh nghe nghe a ni.

Dealer pakhat chuan hetiang harsatna an tawh lai tak hi state sorkar in Assam sorkar a biak hun tak tur a nih thu sawiin sorkar chuan Meghalaya petrol pump ami tur te chu kaltlangpui tura hrilh tura an duh thu a sawi.

Meghalaya-a petroleum kaihhnawih pawl hrang hrang te chuan petrol leh LPG kaihhnawiha bandh awm ṭhin chu phal tawh lo turin an nawr bawk a ni.