AP-a district 3-ah AFSPA an pawtsei

Union ministry of home affairs (MHA) chuan Arunachal Pradesh-a Assam ramri bula district pathum - Tirap, Changlang leh Longding chu disturbed area-a puan chhunzawmin, Armed Forces Special Powers Act (AFSPA) hman mek chu thla ruk dang a pawtsei.

Heng district pathum bakah hian Namsai district-a Namsai leh Mahadevpur police station pahnih huam chhungah AFSPA hi pawhsei a ni bawk. Sorkar laipui chuan dan pawna hnawl, inlakhran duhtu pawlte an la chetlat zel avangin disturbed area-ah dah chhunzawm an ni tih a sawi.

Sorkar laipui chuan heng hmunte hi kumin April 1 khan disturbed area-ah a lo puang tawh a, thla ruk atan puan ni mah se thupek a tihchhuah tharah hian nakkum March 31 thleng atan a pawtsei leh ta a ni. AFSPA hman chhunzawmna tura a puanah hian helpawl National Scoialist Council of Nagaland (NSCN-K), United Liberation Front of Assam (ULFA) leh National Democratic Front of Bodoland (NDFB)-te an la chetla reng nia sawi a ni.

Hetih lai hian MHA thupek tihchhuah tharah hian Lohit district-a Sunpura police station leh Lower Dibang Valley district-a Roing police station huam chhung 'disturbed area' a puanna chu hlih a nih thu a tarlang thung.

Sipai hnena thuneihna sang pekna, AFSPA hi hmarchhak state dang ṭhenkhatah hman mek a ni bawk a, Assam-ah pawh thla ruk atan pawhsei a lo ni tawh a ni. He dan hnuaiah hian sipaite chuan warrant nei kher loin an mi rinhlelhte dapin an man thei a ni.