Sikkim-in mineral water bottle lakluh khap dawn

Sikkim chief minister PS Tamang chuan kum 2022, January 1 aṭang chuan an state-ah mineral water bottle lakluh an khap dawn tih a sawi a, "Kan state hian tui thianghlim, quality ṭha si kan nei ṭha a ni," a ti.

CM chuan plastic bottle-a tui an sawngbawl tawh ai chuan, state chhunga tui chu a thianghlimin a hrisel zawk tih a sawi a, Sikkim mipuite chuan mineral water bottle aiin natural water resource chu an thlang zawk ngei dawn tih a sawi.

Sumdawng, mineral water bottle la lutte tan an stock neih sa tihralna turin thla thum hun an pe dawn tih sawiin, kumthar aṭang chuan lakluh phal a ni tawh dawn lo tih a sawi. Tourit hotspot, North Sikkim-a Lachen-ah chuan mineral water bottle hi an lo khap tawh a ni.

Sikkim chu natural water resources lamah a hausa a, tui thianghlim in tur pawh an mamawh khawp an nei tih CM chuan a sawi.