MHA-in Abonmai case chhui turin NIA hriattir

Ministry of home affairs (MHA) chuan Manipur-a Naga leader Athuan Abonmai rukbo leh thah a nih chu chhui turin National Investigation Agency (NIA) a hriattir.

Manipur special secretary (home) H.Gyan Prakash chuan Abonmai case la tura MHA-in NIA hnena order a pek tawh thu hi thuchhuah siamin a tarlang a ni.

Hetih lai hian Manipur Joint Action Committee (JAC) chuan nizan zanlai atang khan rawng taka Abonmai thah a nih an demna leh, pawikhawihnaa inhnamhnawihte man chhuah a, hremna pek phutin darkar 24 awh total shutdown an huaihawt.

JAC chuan Abonmai chunga pawikhawihna thlenga in­hnamhnawiha puh pawl (organisation) chu state sorkar pawhin a hriatchian tak nia sawiin, hei vang hian state sorkar pawhin rang takin hma a la tur a ni, an ti.

Abonmai thah a nih dana lungawi loin Manipur-a civil society organisation leh zirlai pawl hrang hrangte chuan kawng pawh an lo zawh tawh a ni. Police-te tualthahnaa inhnamhnawiha rinhlelh mi pahnih an man tawh bawk.