Meghalaya : Williamnagar by-election-ah NPP an chak chiang

Meghalaya East Garo Hills-a Williamnagar Constituency-a by-elec­tion neih result chu nimin khan puan niin National People’s Party (NPP) chuan chiang takin hnehna an chang.

NPP leh a kaihhruai sorkar hian Meghalaya Assembly inthlan, Feb­ruary 27-a neihah khan sorkarna an siam tawh bawk a, Williamnagar constituency-ah pawh hian hnehna an chang leh a ni.

NPP candidate Mar­cuise Marak chuan vote 9,558 hmuin hnehna a chang a, amah hnaih bertu Independent candidate Sengbath Marak aiin vote 4,860 in a hmu tam a, Sengbath hian vote 4,698 a hmu a ni.

Sengbath dawta vote hmu tam leh chu Congress candidate leh MLA hlui ni bawk Deborah Marak a ni a, vote 4,517 a hmu thung.

Hel ten Meghalaya Asssem­bly inthlan hma lawka an thah tak Jonathone N Sangma nupui, NCP candidate Krinila N Marak chuan vote 4,009 a hmu bawk a, BJP candidate Santosh R Marak chuan vote 865 chiah a hmu thung.

Williamnagar Constituency hi Congress party chakna tia hriat ṭhin a ni a, mahse kumin inthlanah hian NPP chuan chiang takin hnehna an chang ta thung a ni.

Inthlanna ni April 27 khan neih niin vote 78.82% a tla a, inthlan tihkhawtlai a nih chhan hi he biala ding tur NCP candi-date Jonathone N Sangma chu Meghalaya Assembly inthlan hma lawk, February 18 khan hel ten IED bomb hmanga an thah vang a ni.