Karnataka-ah Tripura CM campaign dawn

Tripura Chief Mi­nister Biplab Kumar Deb chuan Bharatiya Janata Party (BJP) hruaitu hlun te zuiin May 12-a assem­bly inthlanna nei tur Karnataka-ah cam­paign in a kal ve dawn tih Thawhṭannia official thuchhuah chuan a tarlang.

Party thuchhuah chuan BJP President Amit Shah chuan BJP in sorkarna a siamna state-a chief minister te chu Karnataka-ah hian campaign pui turin a sawm niin a sawi a, Tripura CM Deb pawh heng zingah hian a tel a ni.

Deb hian nimin khan New Delhi-a pan a, New Delhi-a a tihtur te a tih zawh hnuah hian Karnataka lam hi a pan rin a ni.

Hetihlai hian Biplab Kumar Deb hi tunhnaia a thusawi hrang hrang avangin sawisel a hlawh nasa hle a, zirlaite chu sorkar hna zawng lo a kuhva dawr siam tura a tih te chuan state chhunga zirlaite sawisel a hlawh nasa hle a, Maha­baharata hunlaia internet leh satellite a awm tawh tih a sawi te, 1997 kuma Diana Hayden Miss World-a thlan a nih dan a hriatthiam loh a sawi thu te leh kar liamta Zirtawpni-a civil service day-a thu a sawinaah civil engineer-te chu civil service officer nih tum tura a fuih laia mechanical engineer-te erawh chuan an tum ve tur a ni lo tia a sawi te chuan internet lamah sawisel a hlawh nasa hle a, mi challang tam tak pawhin an lo sawisel tawh bawk.

New Delhi-a a kal chhan tur pawh hi Prime Minister Narendra Modi-an inhnialna chawk chhuak thei thil tam tak a sawi vangin a ko nia sawi a ni a, BJP president Amit Shah leh PM hian an kawm dawn nia sawi a ni.

Vawiin hian PM leh Amit Shah hi a hmuh rin a ni.