Meghalaya Minister-ten Alappuzha Waste Management model zir chiang turin Kerala tlawh

Meghalaya Urban Affairs Minister Hamlet­son Dohling, PHE Minister Samlin Malgniang leh Government Chief Whip Agatha K. Sangma te chu Kerala-a Alappuzha khuaah zinin waste management model danglam tak an neih zirchiang turin an kal.

Alapphuzha an tlawhnaah hian Megha­laya minister-te leh official-te hian Alappuzha Municipal thuneitute kawmin, an hmalak dante an zawt a, waste management project an kalpuina hmun hrang hrang te an tlawh bawk.

Alappuzha model hi Uni­ted Nations Environment Prog­ramme (UNEP) hnuaia sustainable management of solid waste hlawhtling ber zinga puan a ni a, khawvelah pawh a ṭha ber pawla ngaih a ni.

Alappuzha Municipal Board hian an project kalpuina hnuaiah hian chokaa hman tur bawlhhlawh bawm 5000, biogas plant 3000, pipe composting unit 2800 leh aerobic compositing unit 218 an siam tawh a, heng te hi an municipal area chhungah siamin hemi hmang hian an khaw chhunga mihring awm zat nuai 1.74 aṭanga 80%-ten bawlhlawh an paihchhuah chu ṭha taka sawngbawlin an thianfai thei a ni.

Agatha K. Sangma chuan Pathianni khan Kerala-a Alappuzha khua chuan plan mumal tak an neih thu a sawi a, chhungkaw tinin an bawlhhlawh neih te chu ṭha taka an thenfai theih thu a sawi.

Hamletson Dohling chuan Alappuzha model for waste management chu an zir­chian thu sawiin Meghalaya Municipal area-a hman a nih ve theih dan tur an ngaihtuah thu a sawi a, Shillong leh Tura-ah pilot basis in an ṭan thuai dawn tih a sawi bawk.

Meghalaya aṭanga kal te hian municipal area zawng zawngah bawlhhlawh tihral dan tur an ngaihtuah dawn tih an sawi.

Dohling chuan Meghalaya in 2022-a National Games an thlen hunah pawh Meghalaya chu an theih ang chen chena waste-free-a siam an tum thu a sawi a ni.