Ka sorkar laka lo inrawlh ve chu an kuttin hlehsak an ni ang : Tripura CM

Tripura Chief Minister Biplap Kumar Deb chuan vantlang hmaa thu a sawinaah a kaihhruai sorkar inrelbawlnaa inrawlh an awm chuan an kuttin hlehsak an ni dawn tih a sawi.

Tunhnaiah a thusawi hrang hrang vanga sawisel hlawh nasa tak Biplap Kumar Deb chuan a kaihhruai sorkar inrelbawlnaah chuan midang an inrawlh ve tur a ni lo tiin, BJP hruaitu chuan a kaihhruai sorkar chu Biplap Deb-a sorkar a ni tih an ringhlel tur a ni lo, a ti.

Tripura CM hian tunhnai mai khan mechanical engineer-te chu civil service office nih tum lo tura a tih laiin Civil engineer-te chu nih tum turin a ti a, hna nei lo te chu sorkar hna zawng lo turin leh ran vulh zawk turin a ti bawk a, Diana Hayden 1997-a Miss World-a thlan a nih chhan a hriatthiam loh thu a sawi te leh Mahabharata hunlaia internet a awm tawh tia a sawi te chuan internet lamah nasa taka sawisel leh nuihzat a hlawh a, mi tam takin an dem thu te pawh an sawi tawh bawk.

Hetih lai hian Deb chuan mechanical engineer-te chu civil service join lo tura a tih loh thu leh civil engineer-te chu administration lama experience an neih avangin civil service join tura a tih mai thu a sawi ve thung.

Inhnialna chawkchhuak thei thil hrang hrang a sawichhuah avang hian Prime Minister Narendra Modi chuan New Delhi-ah Deb hi a ko a, nimin khan PM leh BJP national president Amit Shah te a hmuh rin a ni.

Biplap Kumar Deb hian Prime Minister te a hmuh zawh hunah hian Karanataka-ah BJP tana campaign nei turin ruahmanna a siam bawk.