Assam Congress-in an MLA suspend

Assam-a Congress MLA Sherman Ali Ahmed chu kum 40 vel liam taa thil thleng chungchanga a thu sawi avangin man a nih hnuah, Congress party pawhin an MLA hi an suspend zui ve nghal.

Assam Congress general secretary Bobbeeta Sharma chuan state unit president Bhupen Kumar Borah chuan MLA Ahmed hi party dan kalha a chet fo avangin a suspend a ni tih a sawi. Hemi hma hian buaina leh inhuatna chawk chhuak thei zawnga thu a sawi avangin party hian show-cause notice pawh a lo pe tawh bawk a ni.

Baghbar bial aṭanga MLA term thumna hmang mek, Sherman Ali Ahmed hian kum 1983-a Darrang district-a sorkarin sorkar ram awmte hnawhchhuah, eviction drive a neih ṭuma buaina chhuaka thi mi pariatte chu tualthattu tiin a sawi a ni. He buaina chhuaka thite hi Assam mipuite chuan martar angah hial an ngai thung a, hei vang hian MLA thusawi hian sawisel a hlawh nghal hle a, a lakah FIR pawh eng emaw zat ziahluh a ni tawh.

Congress MLA hi a thusawi avang hian Inrinni khan man a ni tawh a, Pathianni khan court-ah kalpuiiin ni hnih chhung police custody-a awm tura tih a ni bawk. Sakhua leh hnam behchhana inhuatna chawk tho thei zawnga thu sawiah puh a nih avangin Indian Penal Code (IPC)-a Section 153 leh 153A hnuaiah thubuai siamsak a ni.

Ahmed hian thla liam taa Darrang district-a sorkar rama awmte chhuahtir tuma buaina chhuaka mi pahnih an thih chungchang a sawinaah a sawi chhuak a ni. September 20 khan Dholpur-a hmun paliah state sorkar chuuan eviction drive neiin, sorkar rama cheng chhungkaw 800 dawn chu chhuahtir an ni a, an zinga a tam ber chu Bengali ṭawng hmang Muslim an ni.

Report ṭhenkhat chuan Congress party chhungah hian inhriatthiam lohna awmin, Ahmed hi BJP agent ang maiin a awm tawh a, chief minister Himanta Biswa Sarma nen pawh an inpawh ṭha hle a, by-election an hmachhawn mek avangin Congress party hming tichhe turin hetiang hian an tih tir niin an sawi.