VP Naidu-a'n Guwahati-a Heritage Centre a hawng

Vice president Ven­kaiah Naidu chuan Pathianni khan Guwa­hati-a Mahabahu Brah­maputra River Heritage Centre siam a hawng.

Heritage-cum-cultural centre hi Guwahati-a DC Bungalow hlui bulah siam a ni a, he hmuna Assam state thil hlui leh hlu tak takte pholanna tur a ni. Heritage Centre hawnnaah hian Vice President hi chief minister Himanta Biswa Sarma leh official dangten an ṭawiawm a ni.

Vice President hian Pathianni vek hian Gau­hati Medical College Hospital (GMCH)-a PET-MRI wing a hawng bawk. PET-MRI wing thar hi hmarchhak state-a a hmasa ber niin, cheng vaibelchhe 62 senga siam a ni.

Naidu hian 'Lokpriya Gopinath Bordoloi Award for National Integration and Contribution' semna hun a hmanpui nghal bawk a, he chawimawina hi writer leh scholar Nirode Kumar Barooah, Kasturba Gandhi National Memorial Trust member leh Shillong Chamber Choir member-te hnenah a hlan.

Vice President chuan prime minister Naren­dra Modi kaihhruai sorkar laipui chuan hmar­chhak bialin kawng hrang hrangah hma­sawnna thlen chu a ngai pawimawh hle tih sawiin, Assam leh state dangten chak zawka hma an sawnna tur pawhin hma lakna hrang hrang a kalpui a ni, a ti.

Assam chu hmarchhak pum tana hmasawnna kawnga entawn tur a ni dawn tih sawiin, Naidu chuan hmarchhaka air-connectivity tihchangtlun chhoh pawh tum a ni tih a sawi.