Assam : ‘Adopt a Heritage’ scheme Pawl hrang hrangin an dodal

Sorkar laipuiin ‘Adopt a Heritage’ scheme Assam-a a kalpuina tura thu­chhuah a siamah corpo­rate kuta tourist site hrang hrang a dah dawn nia a tarlan chu Nilaini khan Assam-a pawl hrang hrang chuan nasa taka sawiselin an dodal.

Coporate kuta a dah tur nia a tarlan te chu cen­tral Assam-a Kairanga National park te, historical monuments Rangghar te, upper Assam-a Sivasagar district-a Kareng Ghar leh Shiva Dol te an ni.

Sorkar laipui thuchhuah siam hi Krishak Mukti Sangram Samiti (KMSS) leh All Assam Students’ Union (AASU) te chuan nasa taka sawisel in an dodal thu an sawi.

KMSS hruaitu Akhil Gogoi chuan heng hmun pali te hi Assam in inchhuanna a neih ve te an nih thu sawiin Kaziranga National Park phei chu khawvel pum huapa lar a nih thu a sawi a, an theihna zawng zawnga sorkar laipui thutlukna chu an dodal dawn thu leh, Assam mipuite chuan an dodal tlat dawn thu a sawi. Sorkar laipuiin heng site-te hi a enkawl thei lo a nih chu Assam mipui ten kan enkawl ang, a ti.

AASU pawhin sorkar thutlukna chu sawiselin heng heritage site-te hi private kuta hlan an ni tur chu an pawm theih loh thu an sawi a, Archaeological Survey of India (ASI) kutah heng hmun te hi awm an ni a, ASI in an enkawl thei lo a nih chuan an officer-te mawhphurhna a nih thu an sawi.

Assam-a eptu pawl lian ber Congress pawhin thuchhuah siam ve nghalin Assam Pradesh Congress Committee hotu Ripun Bora chuan sorkar laipuiin he thutlukna hi kaltlangpui a tum a nih chuan Congress chuan kan dodal dawn a ni, a ti.

Hetih lai hian Assam Chief Minister Sarbanada Sonowal-a kaihhruai sorkar chuan Nilaini vek khan hemi chungchang hi sawifiahin thil hriat fuh tawk lo a awm niin a sawi.

Assam Tourism De­velopment Corporation Ltd (ATDCL) chuan sorkar thuchhuah siam chu state chhungah a ni lo zawnga thehdarh a nih thu an sawi a, sorkar in heng heritage site-te hi private company kutah a hlan dawn loh thu an sawi.

ATDCL chuan corporate social responsibility (CSR) hnuai­ah company-te chuan heng site-ah te hian development ame­nities an kalpui ringawt dawn nia sawiin toilet, parking, cafeteria leh tourist-te chawlhna tur stall-te an siam mai dawn niin an sawi a, ATDCL chairman Jayanta Malla Barua chuan a hmun tak tak erawh an khawih dawn lo tih a sawi ve thung.