Assam : Tezpur University Faculty in Visitor’s Award 2018 dawng

Assam-a Tezpur University (TU)-a Depart­ment of Molecular Biology and Biotechnology professor, Prof. Ashis. K. Mukherjee chu President Ram Nath Kovind-an Nilaini khan Basic and Applied Science field-ah chawimawina sang, Visitor’s Award 2018 a hlan.

He chawimawina hi Central Univesity-ten Vice Chancellor meeting Rashtrapati Bhavan-a an neihah hlan a ni. Mukherjee bakah hian Madhya Pradesh-a Dr Harisingh Gour Vishwavidyalaya-a professor, Prof. Sanjay K. Jain pawhin a dawng ve bawk a ni.

President hian Central University-te Visitor a nihna angin ramchhung hmun hrang hranga central university-ten inelna thianghlim an neih theih nan leh ṭha taka hna an thawh theihna tura phurna pe turin award hi kumtin a sem ṭhin a ni.

Professor Mukherjee hian India ram hmun hrang hranga rul tur-te molecular complexity leh components toxicity-te tifiah tura research a beihna kawngah chawimawina hi hlan a ni a, kum 24 kalta chhung khan rul tur chanchin hi a zirchiang tawh a ni. Prof. Mukherjee-a zirchianna hian rul tur chanchin hriatchianna lamah hmasawnna nasa tak a thlen beisei a ni bawk.

Mukherjee hi tunhnai lawk khan University of Calcutta chuan a research avang hian honorary degree Doctor of Science (D. Sc.)-a lo pe tawh bawk.

Academician Prof. Mukherjee hian a hma pawhin ramchhung mai bakah international award-te pawh a lo dawng nual tawh a, ISCA Young scientist award, National Bio-science award-te bakah DST aṭangin BOYSCAST fellowship-te pawh a lo hmu tawh bawk a, DBT Crest award leh TU aṭangin Best Researchers Award-te pawh a lo dawng tawh bawk a ni.

Visitor's Award dawng tur thlangtu selection committee hi Sanjay Kothari, Secretary to the President kaihhruaina hnuaiah neih a ni.