Sikkim-a Nathu La-a Sino-Indian Border Trade chhunzawm leh ta

Sikkim-a India leh China sumdawng ten an insumdawn tawnna hmun, Nathu La chu hun eng emaw chen khar a nih hnuah Thawhlehni aṭang khan hawn ṭan a ni leh ta a, sumdawng mite leh sorkar official-te chuan thilpek te inpe tawnin chibai te an inbuk bawk.

Nathu La kaltlang hian India leh China hian insumdawn tawnna nei ṭhin mah se nikum lama Doklam-a India leh China sipai te an inep avang khan khar a ni a, sumdawng mite chuan kuminah hi chuan buaina a awm tawh loh an beisei niin Sikkim sorkar official chuan a sawi.

Sikkim sorkar official chuan India sum­dawng te leh Tibetan Auto­nomous Region (TAR)-te chuan kuminah hi chuan buaina a awm tawh loh an rin thu leh a eng zawnga hma lam hun an thlir thu a sawi. India leh China hian Nathu La-a insumdawn tawnna hmun hi nikum July thla aṭang khan an khar a, Thawhlehni khan an hawng leh chiah a ni.

Indo-China Border Tra­ders’ Welfare Association General Secretary Tenzing Tsepel chuan nikuma Doklam-a inepna avang khan Nathu La hi kar hnih chhung chauh hawn hman a nih thu sawiin, kuminah chuan khatiang thil kha a thlen tawh loh a beisei thu a sawi.

Sikkim Commerce and Industries department official chuan 2016-17 chhunga Nathu La-a insumdawn tawnna a sum che vel chu cheng vaibelchhe 3.54 vel a nih thu a sawi.

Nathu La-a insumdawn tawnna hi kum 44 zet khar a nih hnuah 2006 khan hawn leh a ni a, nikum July khan khar ni leh mah se Thawhlehni khan hawn a ni leh ta a ni.

Trader's association chuan Thawhlehni khan ITBP leh PLA-te telin ram pahnih official-te chuan mee­ting an neih thu sawiin currency exchange leh inkalpawhna chungchang te an sawi niin an tarlang bawk.

Nathu La-ah hian India sumdawng te hian oil, ghee, blanket, copper item, rice leh textile-te an hralh ber a, hetih lai hian TAR lam hian thawmhnaw a bik takin jacket chu India lamah hian an chawklut nasa niin official-te chuan an sawi bawk a ni.