Nagaland HC sak chungchanga buaina CBI in chhui dawn
Gauhati High Court chuan Nilaini khan thuchhuah siamin, Nagaland sorkarin Kohima-a Nagaland High Court sakna tur a khawihchingpen nia puhna chu Central Bureau of Investigation (CBI) kutah dah a nih thu a tarlang.
Gauhati High Court Chief Justice Ajit Singh chuan sorkar an puhna hi CBI-ten a thlawp thei material an hmu a nih chuan thla thum chhunga report thehlut a FIR file turin a ti a ni.
Nagaland HC building tur hi kum 2007 daih tawh khan Meriema-ah a lungphum phum tawh ni mah se vawiin thleng hian sak zawk a la ni lo a ni. He building sak nana sum ruahman aiin cheng vaibelchhe 9.63 zetin an hmang tam tawh a, heti chung hian Nagaland High Court ruala ruahmanna an siam tho, Manipur, Meghalaya leh Tripura High Court-te chu kum 2013-ah khan hman ṭan an lo nih daih tawh avangin Nagaland HC tur sak muang leh lutuk chu CBI hian an chhuichiang dawn a ni.
RTI chuan he project atan hian cheng vaibelchhe 43 ruahman a nih thu a tarlang.
2009-2014 chhung khan Nagaland Department of Law and Justice chuan cheng vaibelchhe 41.62 an lachhuak tawh a, 2015-17 chhung khan cheng vaibelchhe 11.25 lachhuak lehin he project atana sum an lakchhuah tawh zawng zawng hi cheng vaibelchhe 52 lai a tling tawh niin report chuan a tarlang.
Heti chung hian building hi 35% chiah khawih a la ni a, a department concern chuan HUDCO hnenah loan cheng vaibelchhe 12 an lachhuak tawh bawk a ni.
Court thuchhuah chuan Nagaland-a RTI activist ṭhenkhat chuan high court-ah hian petition an thehluh thu tarlangin, judge-te bungalow atan cheng vaibelchhe 22.42 lakchhuah a nih thu an sawi tih a tarlang bawk a, mahse heti chung hian bungalow sakna tur hmun pawh hi ruahman a ni lo niin an sawi tih a tarlang bawk.
Court thupek chuan electric pekna atan leh tui supply-na atan Rs 44,24,700 zet lakchhuah a nih bawk thu sawiin building structure pawh an la zo lo tih an tarlang a, consultancy fee atan cheng vaibelchhe 1.30 lakchhuah a ni bawk chu thil awih harsa tak a nih thu an tarlang.
Court chuan pawisa an hmandan chu thilmak tak a nih thu sawiin chhuichian ngei a ngai tih a tarlang bawk a ni.