Regional panel member-ten Assam-Meghalaya border tlawh

Assam leh Meghalaya sorkarin state ramri buaina chungchang buaipui tura regional committee an dina member-te chuan Thawhṭanni khan Kamrup leh West Khasi Hills district-a ramri buaina an neih mekna zinga hmun pasarih an tlawh.

Committee member-te hi Assam border area development minister Atul Bora leh West Khasi Hills regional committee chairperson leh Meghalaya PHE minister Renikton Lyngdoh Tongkhar-ten an ho a ni.

Pathianni tlai khan regional committee-te hian meeting an lo nei tawh bawk.

Assam minister Bora chuan, "Regional committee-te hian Assam-Meghalaya border-a Hahim, Athiabari, Salbari, Malchaprara, Gameriuma leh hmun dangte an tlawh a ni," tiin a sawi a, ramri hrula chengte chu kawmin, khawchhua hotute leh pawl hrang hrang aiawhte pawh a kawm a, an harsatna leh rawtna neihte an ngaihthlaksak thu a sawi.

"Tun ṭum hi vawi khat kan tlawhna a ni a, bul kan ṭan ṭha hle niin kan hria. Hun rei tak ramri buaina lo awm tawh pawh hi chief minister pahnihte hmalaknain chinfel theih ngei kan beisei a ni," tiin Bora chuan a sawi a ni.

Meghalaya minister Tongkhar pawhin a hmun ngeia thil awmdan enfiah tura kal an nih thu sawiin, an thil hmuh dante chu state pahnih sorkarah an thehlut dawn tih a sawi. Thutlukna engmah siam nghal a ni lo a, state pahnih aiawhte inbiain an la sawiho zel dawn tih a sawi nghal bawk.

Assam leh Meghalaya hian ramri buaina an neihna hmun 12 zinga paruk - Tarabari, Gizang, Hahim, Boklapara, Khanapara-Pilangkata leh Ratacherra-ah buaina chinfel dan kawng an dap mek a ni. Heng hmunte hi Meghalaya-a West Khasi Hills, Ri Bhoi leh East Jaintia Hills district leh Assam-a Cachar, Kamrup Metro leh Kamrup district-a mite an ni.

Ramri buaina chungchang buaipui tur hian state pahnih hian regional committee pathum dinin, committee tin hi cabinet minister-in an ho a, committee-ah hian member panga zel an awm. Ramrite an tlawh a, an sawiho leh hnuah report an thehlut ang.