Manipur-ah vaccine semna atan drone hmang

Manipur state-ah a ṭum khatna atan Covid vaccine semna atan drone hman a ni.

Thawhṭanni khan Manipur-ah hian ICMR Drone Response and Outreach in North East (i-Drone) programme chu union health minister Mansukha Mandaviya chuan hawngin, Bishnupur district hospital aṭangin drone hi km 15-a thui thlawhtirin Loktak Lake-ah PHC-a semchhuah tur vaccine hi a dah a ni. Kawngpuia kal chuan a thui zawng hi km 26 zet a ni pha a ni. Vaccine hi a dah hnuah PHC aṭang mi 10 in dose hnihna lain, midang pariatin a dose khatna an la nghal bawk.

Union minister Mandaviya chuan hmasawnna ropui tak a ni tih sawiin mipuite pawh a lawmpui thu a sawi a, "Drone hi damdawi mamawh zual semna atan leh blood sample lakkhawmna atan pawh kan hmang thei dawn a ni. He technology hi dinhmun khirh zualna hmunah hman theih a ni a, kalpawh harsa leh buaithlakahte health supply-na atan a ṭangkai dawn hle a ni," a ti.

Drone hmang hian state chhung hmun kalpawh harsa zualahte vaccine semchhuah a ni thei dawn tih sawiin, Minister chuan Covid-19 vaccine semchhuah kawnga hmalakna chu beisei phak bakin a hlawhtling chho mek a, he ruahmanna hian nasa zawkin a pui thei dawn bawk tih a sawi.

Prime minister Narendra Modi kaihhruaina hnuaiah India chuan nasa takin hma a sawn a ni tiin Mandaviya chuan Manipur tan i-Drone programme hman ṭan a ni chu thil chhinchhiah tlat tak a nih thu a sawi a ni.

i-Drone hi hmun kilkhawr leh tlawhpawh harsa zualah hman turin ruahman niin, tunah hian drone-based delivery project hi Manipur leh Nagaland bakah Andaman and Nicobar Island-ah hman phalsak an ni. Programme ṭan a nih hma hian ICMR chuan Indian Institute of Technology, Kanpur thawhpuiin a rintlak dawn em tih an lo zirchiang hmasa tawh a ni.