Naga Peace Accord ziahna turin deadline a awm lo: Nagaland CM

Nagaland Chief Minister Neiphiu Rio chuan kar liamta Ningani khan New Delhi-ah Home Minister Rajnath Singn hmuin, Naga political issue chinfel dan tur chungchang a sawipui a, meeting an neih zawh hnu hian Neiphiu Rio chuan Naga Peace Accord ziahna turin hun bithliah siam a nih loh thu a sawi a, mahse a rang thei ang bera inremna siam erawh an tum ber a nih thu a sawi.

Neiphiu Rio chuan Armed Forces (Special Powers) Act (AFSPA) chungchang pawh sawiin Nagaland dinhmun chu a la mumal loh avangin he act hi hlih a ni lo tih a sawi bawk.

Rio chuan inremna zawnga inbiakna hi National Socialist Coun­cil of Nagaland- Isak Muivah (NSCN-IM) leh sorkar laipui chuan kum 20 chhung zet an kalpui tawh tih sawiin a rang thei ang bera buaina chinfel chu a hun tawh tih a sawi a ni.

Naga awmna chin NSCN-IM-ten an ram china rin luh an ngiat chungchanga zawhna chu Rio chuan chhangin buaina awm thei chung chang sawi an duh loh thu leh, lungrual taka awm ho dan chungchang zawk an ngaihtuah thu a sawi. Rio leh Union Home Minister hi minute 45 zet an inkawm a ni.

Rio chuan May 11 hian Kohima-ah remna zawnga inbiakna chung­changah hian tribal pawl hrang hrang te nen inbiakna neihpui a ni dawn tih a sawi bawk.