Assam leh Nagaland-ah AFSPA hlip maithei : Kiren Rijiju

Union Minister of State for Home Affairs Kiren Rijiju chuan Pathianni khan dan sawisel hlawh tak Armed Forces (Special Powers) Act (AFSPA) chu Assam leh Nagaland-ah hlih a ni maithei niin a sawi a, boruak awmdan erawh an la thlithai phawt dawn tih a sawi.

Kiren Rijiju chuan Naga political issue chin­felna zawnga inbiakna NSCN-IM leh sorkar laipuiin an neih mek pawh uluk taka kalpui a nih thu a sawi bawk a, rah ṭha tak a chhuah ngei dawn tih sawiin inremna thutlung ziah hun tur erawh a sawilang duh lo a ni.

Armed Forces (Special Powers) Act hi Meghalaya pum­puiah hlih vek a ni tawh a, mahse Arunachal Pradesh leh Nagaland hmun ṭhenkhat bakah Assam hmun ṭhenkhatah erawh hlih a la ni ve lo thung.

Dan sawisel hlawh tak AFSPA hnuaiah hian security force te chuan an duh duhin beihpui an thlak thei a, hriattirna mumal awm loin mi an man thei a an kap thei bawk a ni. He dan hi hmarchhak state ṭhenkhat bakah Jammu and Kashmir-ah hman mek a ni. Human rights palzutna leh tharum thawh theihna nasa tak nia puhin he dan hi hmarchhakah leh Jammu and Kashmir-ah pawh hian hlih a nih theih nan mi tam takin hma an la mek a, nasa takin mi tam takin an sawisel bawk.

National Socialist Council of Nagaland-Isak Muivah (NSCN-IM) leh sorkar laipui inbiakna kal mek chungchang pawh sawiin Rijiju chuan Narendra Modi sorkar chuan hmarchhak bakah Naga buaina chu a ngaipawimawh hle niin a sawi. Inbiakna pawh tluang taka kalpui a nih thu a sawi a, inremna thutlhlung ziah hun tur an zawh erawh a chhang lo thung.

August 3, 2015 khan NSCN-IM general secretary Thuingaleng Mui­vah leh sorkar lai­pui aiawh R N Ravi te chuan Prime Minister Narendra Modi awm laiin framework agreement an ziak a, mahse vawiin thleng hian he agreement-a thu inziak te hi tarlan a la ni lo. Mi ṭhenkhat chuan he inremna an ziahah hian Nagaland ṭhenawm state Assam, Arunachal Pradesh leh Manipur-te chuan an ramchin an hloh ṭhen dawn nia sawi a awm avangin mi tam takin an sawisel a ni.

Hel pawl leh sorkar laipui hian Naga buaina chingfel tur hi kum 18 chhung zet chu inbiakna vawi 80 vel zet an nei tawh a, hemi hnu hian framework agreement hi an siam thei ve chauh a ni.