ILP hman a ni dawn : Manipur CM

Manipur Chief Minister N. Biren Singh chuan Pathianni khan fur assembly session neih hunah Inner Line Permit bill putluh a nih dawn thu a sawi.

Chief Minister chuan bill putluh a nih hma hian stakeholder zawng zawng chu a draft siam dawnah hian rawn an nih dawn thu sawiin mipui section hrang hrang ngaihdan pawh lak a ni dawn tih a sawi bawk.

Manipur Assembly chuan 2015 khan ILP chungchangah hian bill pathum a pawm a, mahse President chuan bill pakhat hi a pawm lo a, hetih lai hian bill dang pahnih pawh state chhunga tribal awm ten "anti-tribal" tiin an pawm duh loh avangin paih leh a ni bawk.

He bill duh lohna lantirnaah hian kum 2015 khan tribal ṭhalai 11, Churachandpur-ah 10 leh Imphal-ah pakhat an thih phah tawh bawk a, mitthi ruang te hi tribal activities chuan kum khat aia tam mah la duh lo in sorkar in bill hi a hnuhkir phawt an phut a ni. Hetiang hi ni mah se March 15, 2017-a BJP kaihhruai sorkarna a chan khan heng ruang te hi vui an ni ta a ni.

Biren Singh chuan bill finalise tur hian stakeholder zawng zawng koh an ni dawn tih a sawi a, bill chungchang ngaihtuah tur committee pawh din an nih tawh thu sawiin vawi thum lai meeting an nei tawh niin a sawi a, Works Minister T. Biswajit chuan he committee hi a kaihruai niin a sawi. Bill paih tawh te chu ennawn an ni leh dawn tih sawiin karleh aṭangin preparatory work ṭan a nih dawn thu a sawi bawk.