Inbiakna chhunzawm turin NSCN-IM hruaitute'n Delhi pan

Naga peace accord siamna tura inbiakna chhunzawm turin Thawhlehni khan National Socialist Council of Nagaland (Issak-Muivah), NSCN-IM hruaitute chuan Delhi an pan.

Sorkar laipui aiawh nena inbe tur hian NSCN-IM general secretary Thuingaleng Muivah bakah an pawl hruaitu dang VS Atem, RH Raising leh mi dangte an kal a, meeting neih leh hun turte an tifel dawn a ni. Inbiaknaaah hian Information Bureau (IB) special director hlui AK Mishra chuan sorkar laipui ai a awh chhunzawm zel dawn a ni.

Naga peace accord hi Krismas hmaa tihfel hman theih an beisei nia sawi a ni.

Naga peace talk hi kum hnih dawn chawlhsan lailawk a nih hnuah September 20 khan Dimapur-ah neih chhunzawm leh a ni a, NSCN-IM leh sorkar laipui aiawhte an inbiak hnuah Assam leh Nagaland chief minister-te chuan helpawl hruaitute hi meeting an neihpui ve leh bawk.

Meeting neih hnuhnung berah hian Naga buaina chu a rang thei anga chinfel an duh thu an sawi a ni. Sorkar laipui leh NSCN-IM hian kum 2015, August 3 khan Framework Agreement an lo ziak tawh a ni.

Nagaland deputy chief minister Y Patton chuan ‘Core Committee on Naga Political Issue’ pawhin Naga buaina chungchang sawipui turin Prime Minister leh Union Home Minister hmuh an tum a, ani pawh hian Delhi a pan thuai tur thu a sawi.