Hmarchhak ram hectare nuai 3 chuangah oil palm ching dawn : Union Minister

Union minister for agriculture & farmes welfare Narendra Singh Tomar chuan sorkar laipui hmalakna, National Mission on Edible Oil- Oil Palm hnuaiah India ram puma ram hectare nuai 6.5-a zauah oil palm chin a ni dawn a, heng zingah hian hmarchhak biala ram hectare nuai 3.28 a tel tih a sawi.

Guwahati-a National Mission on Edible Oil- Oil Palm chungchanga business summit a hmanpuinaah Tomar chuan he thu hi sawiin, sorkar laipui hmalakna hmang hian hmarchhak bial chu India rama oil palm hmunpuiah siam a ni dawn a ni, a ti.

"Hmarchhak tana special package siam hian he biala loneitute dinhmun pawh a thlak danglam dawn a, oil palm mills-ah hna tam tak siam a ni dawn a, infrastructure lam pawhin hma a sawn phah dawn a ni," tiin a sawi. He scheme thar hian tel ei chi lama intodelhna tur kawng a hawng dawn tih a sawi bawk. Mission Oil Palm hnuaiah he thlai chingtute chu sorkarin a theih angin a ṭawiawm zel dawn tih a sawi.

Union Minister for Development of North Eastern Region (DONER), G Kishan Reddy pawhin thu sawiin, sorkar laipuiin ruahmanna fel tak hnuaia oil palm scheme a siam chu lawmawm a tih thu a sawi a, investor leh industrialist-te chu hmarchhakah invest turin a sawm bawk.

Arunachal Pradesh chief minister Pema Khandu chuan hmarchhak biala agriculture tihchangtlun leh tihhmasawnna turin investor-te an luh a hun tih a sawi bawk a, oil palm chin chuan loneitute tam tak tan sum lakluhna ṭha tak a siam dawn avangin thil pawimawh tak a ni, a ti.