DA case : Court-ah Assam DIG inlan

Assam-a Special Vigilance Cell-in disproportionate assets (DA) case-a an man, deputy inspector general (DIG-Border) Rounak Ali Hazarika chu nimin khan special judge court-ah a inlan.

DIG-Border Hazarika hi sorkar aṭanga phalna la loa ram danga ṭum eng emaw zat a zin chungchangah kumin July 20 khan suspend a lo ni tawh bawk. Special Vigilance Cell chuan a sum lakluh phu loa hausaa puh a nih chungchangah an thil neihte pawh lo dapin, Thawhṭanni khan Chief Minister pawmpuinain Prevention of Corruption (Amendment) Act, 2018 hnuaiah thubuai an ziahluh sak bawk a ni.

Vigilance Cell-a SP Rosy Kalita chuan Rounak Ali Hazarika hian kum 1992-2021 inkar khan a sum lakluh phu loin assets tam tak, khawih chet theih leh theih lohte a nei tih a sawi, a fa pahnihte zirna senso atan Rs 1,74,12,974 zet a hmang tawh bawk a ni, a ti. Ram pawn lamah thuneitute remtihna tel loin ṭum kua a zinchhuak tih a sawi bawk.

Senior IPS officer hian Henge­rabari-ah in a neih bakah, Dhirepara-ah godown atana hman in a nei bawk a, Guwahati-a Down Town area-ah chenna in neiin, Shimla-ah a nupui hmingin resort a nei bawk. State Bank of India (SBI)-ah salary account neiin, hei bakah hian amah leh a chhungte hian Axis Bank, Yes Bank leh bank dangah account neiin, hengah hian sum tam tham tak an dah bawk a ni, tiin Kalita chuan a sawi.

"Office a luah chhungin Hazarika hian a hlawh bak sum tam tak a la lut a, hei hi Prevention of Corruption (Amendment) Act 2018 Section 2 (c) bawhchhiatna a ni. Sorkar hnathawkin a lakluhna hriat loh leh a sum lakluh phu loa thil tam tak a neih hi dan bawhchhiatna a ni," tiin Hazarika-a'n kum 2019-2020 chhunga a bank account hrang hranga cash/cheque deposit a nih dan a sawifiahna pawh chu an pawm lo tih a sawi bawk.